اااه لو اقدر اسكت الناس دي

بسم الله الرحمن الرحيم



موضوعي النهارده اللي حبيت افضفض بيه هو اللسان .....!!!

هو حاجه غريبه شوية بس حاجه مهمه اوي كمان يعني ممكن تنهار دول بكلمة من شخص له سلطة و ممكن تعلو كمان .....

ممكن تخسر صديق في لحظة بسبب كلمة وممكن كمان تكسب عشرات .....

ممكن كلمة تنهي حياتك وممكن كلمة تخليها احسن .....

كل ده من عضو واحد في جسمك وهو اللسان ........!!!! ! سبحان الله بجد قد ايه العضو ده بيعمل .......

اكيد مش هو ده موضوعي بس اعتبروها مقدمه اللبيب حيفهم منها الكتير و اللبيب كمان اللي حيكمل موضوعي للاخر علشان يعرف سببه

في مواقف كتير اوي تبقى نفسك تسكت اللي قدامك وتقول له يا ريت لو تحفظ لسانك شوية وتسكت .....

انا ححط شوية مواقف اكيد كل واحد فيكم حيلاقي نفسه في موقف منه يكون حصل له مقدرش يسكت اللي قدامه فيه .....

وفي اللي حيكون قدر يسكته وبالتالي حيقدر يفيدنا بإنه يقول لنا الطريقة علشان نحاول نعملها لو كنا في نفس الموقف

اول موقف هو : حاكم ظالم

لسانه مش بينطق غير كل سوء وقرارات تسيء لدولته وللاسلام

سخر لسانه علشان خدمة اغراضه الدنيئة و اللي بتصب في تنفيذ كل اللي يطمح له من سلطان وجاه وكأن الدنيا وقفت له هو ومش حتؤل لغيره في يوم من الايام .....

ظلم شعبه و خلى فترة وجوده في الحكم هي فترة دمار لا اعمار ....

بلسانه انصف الظالم على المظلوم ...... حق الباطل وطمس الحق ......

تاني موقف هو : مفتي الدولة

عينته الدوله علشان يعين المسلمين على امور دينهم .....

خلت من كلمته هي الاساس على اساس تفقهه في الدين ...........! !!!!!!!

بقى هو المصدر لتحريم ما لم يرد قياسا على ما ورد وتحليل الشيء بنفس المنطق .......

بس خانه لسانه وبقى ينطق باللي الحاكم عايزه او على حسب هواه .....

خرج بمليون فتوى بعيده كل البعد عن الاسلام .........

اخرص الحق ونشر الباطل بفتوى باطله .......

ثالث موقف هو : مدير في مؤسسه حكوميه

عارف ان الشباب اللي بيشتغلوا معاه في حاجه للشغل ...بدأ يستغل ده ويشغلهم أكتر و في كل حاجه ....وبدل ما يكون في كلمة شكر بقت كلمة انت مقصر وممنكش فايده هي اللي بتطلع .....

الذل و الاهانه في كلامه -انت مهمل انت متنفعش و شغلك مش مظبوط- هم السبيل الوحيد في رأيه علشان يخلي الموظفين يشتغلوا ومش عارف انها اداة تدميرهم .....

الكلمة السيئة في حق موظف أفنى عمره في شغله.....و الكلمة الطيبه في حق اللي معاه الواسطه .....

رابع موقف و الاخير : شخص قريب منك او كنت فاكره قريب منك

اديته سرك وائتمنته عليه ازاي ممكن في يوم يخون السر وهو اقرب انسان لك -صديق حبيب او حتى من أهلك- ازاي ممكن في يوم يقول للناس على حاجه عنك ازاي وازاي

في يوم وليله لقيت كل حاجه كنت مخبيها عن الناس بقت عند كل الناس ......كأنك كنت مغطي اسرارك وهو بسهولة جه وشال الغطا ده ....

بس خلاص لسانه قال كل اللي انتي خبيته عن الناس لسانه قال اللي مقدرتش تكتمه في قلبك و ائتمنته عليه .....

تفتكروا في المواقف دي وغيرها نقدر نسكتهم ازاي