ما بعد الموت (موضوع تقشعر لها الابدان)

 السلام عليكم ورحمة الله وبركاته كل عام وانتم بخير بقرب حلول شهر رمضان الكريم..اعاده الله علينا باحب واليمن والبركات الموضوع ده انا قراته فى منتدى وعجبنى اوى وحبيت انقله ليكم ويارب ينال على اعجابكم وتستفيدوا منه.... حد قبل كده فكر ايه اللى بعد الموت؟؟؟ دى قصة تبين هذا ققمت من النوم فجأة في عيني نور غريب وقوي جدا استغربت ..النور ده كله جي منين واندهشت لما لقيت الساعه بتشاور على 3 صباحا وان مصباح الغرفة مطفي طيب النور ده كله جي منين وانفزعت لما لقيت نص ايدي جو الحيطه شديتها بسرعه خرجت وانا ببصلها بكل اندهاش ورجعتها تانى لقيتها دخلت جوه الحيطه استغربت ايه اللى بيحصلي ده وسمعت صوت ضحك بصيت نحيته لقيت اخويا نايم جنبي ولقيته بيحلم بيحلم انه راكب عربيه اخر موديل وانه رايح حفلة كبيره قوي لناس اغنيه قوي وانه لابس اغلى واشيك لبس عشان يكون احلى واحد فى الحفلة وكان بيضحك وفرحان ابتسمت(بس انا عرفت هو بيحلم بأيه ازاى!!!!!) بعدين اتفزعت من اللى بيحصل وقمت من على السرير وجريت على اوضة امي وابويا قعدت اصحى فى امي واطبطب عليها واناديها بس هى مش بتستجيب قعدت اناديها كتير واطبطب كتير ولقيتها فجأه قامت كانت مخضوضه قوي وبتبص يمين وشمال قلتلها يا ماما انت مش شيفانى لقيتها مش بترد ولا بتبصلي قعدت انادى ماما ماما كانت حاطة ايدها على قلبها وبتقول بسم الله الرحمن الرحيم لقيتها بتطبطب على بابا وبتصحيه ولما قام قالت له قوم نطمن على الولاد قالها ده وقته ،قالتله معلش قلبي مش مطمن في حاجه غريبه ..وانا واقف مستغرب قعدت اقولها يا ماما انا اهو يا ماما انت مش شيفانى ياماما قامت ومشيت حاولت امسك هدومها لكن الهدوم مش بتتمسك جريت وقفت قدامها عدت من جوايا ملقتش غير انى امشي وراها وبابا كان ورايا وماحاولتش ابصله عشان ما يتجاهلنيش برده ودخلت امى الاوده وفتحت النور بس ماكنش عندى فرق لأن الدنيا كانت منورة اصلا انفزعت لما لقيتنى نايم على السرير وقعدت ابص لجسمى وايدى وانا مستغرب انا ازاي بقيت اتنين انا مين ومين اللى نايم على السرير ده ان ماكنش انا وقطع استغرابي جملة بابا "استريحتى يا ستى اهم نايمين اهو " لكن هي قالتله معلش انا عاوزه أطمن على محمد ولقيتها بتقرب مني قصدى من الشخص اللى نايم مكانى وبتطبطب عليه كانت بتقوله يامحمد لكن هو مش بيرد وكانت بتطبط بشويش وبدأت تهزه جامد ..جريت عليها وقلتلها يا ماما انا اهو ردي عليا لكن صوتها كان بيزيد خوف وكان بيعلى كانت بتنادي محمد محمد وفجأة صرخت ولقيت الصرخة بتوجعنى قوي كانها بتضربنى ، بكيت وقلتلها ما تصرخيش وهى بتقول محمد وبابا جري عليا وحط ايده على وشى وصرخ وبكى وحسيت بالوجع تانى وقال محمد مش بيرد والبكاء بيزيد وانا مش عارف اعمل ايه صحي اخويا على الصوت وهو بيسال في ايه ماما صرخت اخوك مات يا احمد مات وانا بقولها ببكائي لأوالله مامتش ياماما انا أهوه شوفيني شوفينى انت مش سمعاني لكن ما فيش امل بصيت للسما وقلت يارب ايه اللى بيحصل ده لكن ما لقتش سقف وشفت ناس ولما شوفتهم مشيوا وحسيت بطعنه غريبه وحاجات بتقطعنى بصيت لأحمد لقيته بيصرخ قلتله اسكت انت بتعذبني لكنه كان بيزيد فى الصراخ وماما بتبكي فى حضن بابا والنحيب بيزيد ، وقفت قدامهم عاجز ومذهول ورفعت راسي تانى وقلت يارب ايه اللى بيحصل يارب فى ايه وسمعت صوت من كل حته كان جي من بعيد ركزت معاه لقيته بيعلا وبيزيد كأنه قرآن أيوا قرآن والصوت بدأ يقوى يقوى قوي هزنى من شدته كان بيقول لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ فَبَصَرُكَ الْيَوْمَ حَدِيدٌ وفى ذهول الصوت لقيت ايدين بتطبق عليا اتنين شكلهم مش من البشر بيقولولى تعالا ، قلتهم انتم مين وعاوزين منى ايه ، شدونى صرخت سيبونى ما تخدونيش من اهلى اهلى فاكرنى مت قالولى ما انت مت فعلا قلتلهم ازاي ما انا شايف اهو وباتكلم وحاسس بكل حاجه ابتسموا وقالوا عجيب امركم يا بشر كلكم فاكرين ان الموت نهايه الحياة وما تعرفوش ان حياتكم موت وحلم طويل هتصحو منه على اليوم ده وعلى العالم ده سألتهم انا فين وانتو واخدنى على فين قالولي احنا حراسك لحد القبر اتفزعت قبر ايه انتوا هتدخلونى القبر ردوا كل انسان لازم يدخل القبر قلتلهم بس انا عمرى ما دخلت القبر فردوا وقالوا ده مكتوب على كل البشر قلتلهم طول عمرى كنت بكره الكلمه دي مبحبش اسمعها باستعيذ بالله منها بحاول انسها مكنتش بقدر اتخيل نفسي فى المكان الصعب ده سألتهم بخوفي هتسيبونى قالولي مع عملك سالتهم طيب وعملى ده كويس ، فسكتوا ولقيت واحد بيصرخ وبيبكي وواحد تانى سعيد قوي وكل واحد فيهم واقف معاه اتنين بردة زى اللى معايا سألتهم ده بيبكى ليه قالوا ده عارف مصيره طول عمرة كان من اهل الضلال قلت يعنى رايح النار واللي بيضحك ده رايح الجنه طيب انا رايح على فين قولولي ردوا عليا هما كانو عارفين هما ايه فى الدنيا ودلوقتى عارفين هما فين فى الاخره وانت عشت طول عمرك تايه متردد شويه تمشي صح وشويه تمشي غلط شويه تتوب وترجع تعصي تاني ما كنتش واضح هتفضل برده النهارده تايه مش عارف حاجه اتفزعت وقلت يعنى ايه ؟ انا رايح النار قالولى رحمة ربنا واسعه ولسه الرحله طويله بصيت ورايا لقيت عمي وابويا واخويا ماشين وراهم امي واهلي بيبكوا شايلين صندوق جريت عليهم ناديت ماحدش بيرد ناديت على امى قلتلها يا امى ما تبكيش ادعيلى ناديت على بابا قلته يا بابا خلى بالك من امى واخويا ناديت على احمد قلتله يا احمد خلى بالك من نفسك سيبك من الدنيا ومتاعها دي رخيصه قوي صدقنى مش هتنفعك ناديتهم كلهم بس كانو مشغولين بالبكاء وماحدش سامعنى ماكنتش باتمنى حاجه فى اللحظة دي الا انهم يسمعونى وشدنى الملكين ونزلونى القبر ونيمونى فوق الجسد عشان اشوف ابويا وهو بيرمى التراب عليا بنفسه علشان اشوفهم وهما بيودعونى وخوفى عليهم انهم مش حاسين باللى انا حاسه وحسدى ليهم انهم لسه فى الدنيا بس للأسف كنت بابكى وهما بيبكوا كنت خايف عليهم من الدنيا قوى واتمنى لو اصرخ ولو يسمعونى وخرجوا كلهم وقفلوا الباب والنور اتحول لسواااااااااد بسم الله الرحمن الرحيم لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ فَبَصَرُكَ الْيَوْمَ حَدِيدٌ صدق الله العظيم اعمل للدنيا بقدر بقائك فيها واعمل للآخرة بقدر بقائك فيها واعمل لله بقدر حاجتك اليه واعمل من المعاصي بقدر ما تطيق من العقوبة ولا تسأل الا من لا يحتاج الى أحد واذا أردت أن تعصي الله ....فاعصه..في مكان لا يراك فيه يارب تكونوا استفدتم... والسلام عليكم ورحمة الله وبركاته