وملهمها الأول السيد :محمد حسنى مبارك الى الشعب المصرى
ياشعبي حبيبي ياروحي يابيبي
ياحاطك ف جيبي ياأبن الحلال
ياشعبي ياشاطر ياجابر خواطر
ياساكن مقابر وصابر وعال
ياواكل سمومك يابايع هدومك
ياحامل همومك وشايل جبال
ياشعبي اللي نايم وسارح وهايم
وف الفقر عايم وحاله دا حال
أحبك محشش
مفرفش مطنش
ودايخ مدروخ واخر انسطال
احبك مكبر دماغك مخدر
مشي امورك كدا باتكال
واحب اللي ينصب
واحب اللي يكدب
واحب اللي يسرق وينهب تلال
واحب اللي شايف وعارف
وخايف
وبالع لسانه وكاتم ماقال
واحب اللي قافل عيونه المغفل
واحب البهايم واحب البغال
واحب اللي راضي
واحب اللي فاضي
واحب اللي عاوز يربي العيال
واحب اللي يائس
واحب اللي بائس
واحب اللي محبط وشايف محال
واحبك تسافر
وتبعد تهاجر
وتبعت فلوسك دولار أو ريال
واحبك تطبل
تهلل تهبل
عشان ماتش كورة وفيلم ومقال
واحبك تأيد
تعضد تمجد
توافق تنافق
وتلحس نعال
تحضر نشادر
تجمع كوادر
تلمع تجمع
تظبط مجال
لكين لوتفكر
تخطط تقرر
تشغلي مخك وتفتح جدال
وتبدأ تشاكل
وتعمل مشاكل
وتنكش مسائل وتسل سؤال
وعايز تنور
وعايز تطور
وتعملي روحك مفرد رجال
ساعتها هاجيبك
لايمكن اسيبك
وراح تبقي عبرة وتصبح مثال
هابهدل جنابك
واذل اللي جابك
وهايكون عذابك
دافوق الاحتمال
وامرمط سعادتك
واهزأ سيادتك
واخلي كرامتك ف حالة هزال
وتلبس قضية
وتصبح رزية
وباقي حياتك تعيش ف انعزال
هاتقبل
هاحبك
هاترفض
هالبك
هاتطلع هاتنزل
هاجيبلك جمال