مأساة حصلتلى امبارح فعلا يا أصدقا
السلام عليكم و رحمة الله وبركاته
تحذير لكل أعضاء مجموعتى الأعزاء و لأعضاء المجموعات الأخرى
اود نشر الايميل
الجمعة الماضية 6/7 كان فى اعلان فى جرنال الأهرام ان رايا بتطلب عمالة
المهم انا عادى بعت ايميل فيه السى فى بتاعى و انا مش فى نيتى انى هشتغل هناك او هيتصلوا بيا
المهم اتصلوا بيا يوم الاثنين 9/7 و قالولى عندك مقابلة بكرة ان شاء الله الساعة 11 فى رايا و الاتوبيس اللى هياخدك لرايا هيكون واقف ادام نادى الترسانة فى المهندسين الساعة 10 الصبح
المهم روحت ووصلنا راية فى 6 اكتوبر و فى حتة مقطوعة هناك الساعة 10.30
المهم اخدوا مننا البطاقة على الباب و بعدين دخلنا
اول واحدة جت تلكمنا و تقوللنا على المقابلة جت الساعة 12.40 و كل الفترة اللى قبلها دى و احنا قاعدين نشد فى شعرنا و مش عارفين نعمل ايه و لا نسأل مين لأن مفيش حد نسأله عن اى حاجة
المهم اول دفعة دخلت قعدت حوالى ساعة و نص و منعرفش هما بيعملوا ايه ده كله
بعد كدة دخلوا واحد من اللى جايين معانا فى الباص و عملوا معاه مقابلة لوحده
المهم 5 دقايق و لقيناه خارج شايط ووشه احمر و متعصب جدااا
طبعا كلكم بتسألوا ليه كل ده؟و يا ترى ايه اللى عل فيه كدة؟
اللى عمل فيه كدة انه اصلا بيشتغل فى السياحة و بيقبض مرتب خيالى بس المشكلة انه بيشتغل فى شركة سياحة فى أسوان و هو اصلا عايش فى القاهرة و عايز ينزل القاهرة تانى
فلما قدم و بعت السى فى بتاعه كان متخيل انه هيبقى زى مرتبات السياحة طلع حتى مش زى ربع اللى هو بياخده
تخيلوا بقا انا دخلت المقابلة الساعة كام؟
دخلت الساعة 4.10 العصر
يعنى قاعدة مش بعمل اى حاجة لمدة 6 ساعات الا تلت و من غير ولا أكل ولا شرب ولا اى حاجة لأننا قاعدين فى صحرا جرداء
المهم لما دخلنا اللى عملت معانا المقابلة بعدت تتكلم انجليزى كأن كلب بيجرى وراها و محدش عارف يفهم منها اى حاجة لأن دى مشكلة كبيرة اوىى عند المصريين انهم بيتخيلوا انهم Fluentفى اللغة لما يتكلموا بسرعة
و طريقة كلامها قليلة الزوق أصلا
المهم مش قولتلكم انا بقا الراجل بتاع السياحة ده خرج متعصب ليه
علشان ان شاء الله لما يشغلوك فى فودافون فى خدمة العملاء اللى هى لما تتصل ب 888 و بعدين واحد من خدمة العملاء يرد عليك
هتقبض 1000 جنيه و هتشتغل من الصبح لحد مش اقل من الساعة 10 بالليل و كمان الوكالة بتاعة راية لتشغيل العملاء دى هتاخد نسبة 55% من المرتب اللى انت هتاخده طول مانت بتشتغل فى المكان ده
يعنى عالم ولاد..........و للا بلاش خللينامؤدبين
بس انا فعلا أعصابى كانت خلاص هتفلت و كل ده و فى الاخر البنت الى عملت معايا المقابلة بتقوللى لما عرفت انى مش من القاهرة و من بنها
بتقوللى هتشتغلى لحد الساعة كام؟
قولتلها اقصى حاجة الساعة 5
ضحكت اوى بسخرية و قالتلى يا سلام؟
قولتلها ليه هو فى اكتر من كدة مع العلم انى بتكلم كمان على اساس المرتب
قالتلى اه طبعا اقل حاجة الساعة 10
قولتلها ياااااااااا سلام؟؟؟؟
المهم حضرت نفسى انى اقوم اروح
قالتلى طيب معلش يا انجى ان شاء الله لما يجيلنا حاجة مناسبة ليكى هنتصل بيكى ان شاء الله
و انا كان الود ودى احدفها بأى حاجة قبل مامشى
يعنى انا مستنية ده كله علشان فى الاخر يحصل كدة
المهم بلاااااااااااااااش تعملوا مقابلة فى أى شركة قبل ما تعرفوا التفاصيل بالتليفون قبل ما تروحوا
دى نصيحتى ليكم يا أصدقائى علشان محدش يقع فى الحفرة دى تانى
بلااااااااااااااااااااااااااااش تقدموا فى اى شغل تبع راية اللى بيطلع فى الجرنال كل يوم جمعة لأنكم اولا مش هتشتغلوا فى راية
هيشغلوكوا مثلا فى فودافون او موبينيل او اى بنك فى مصر و هياخدوا 55% من المرتب بتاعك
يعنى انت رايح بتشتغل ليهم
بس
اتمنى الردود بتاعتكم يا أصدقائى بعد المأساة اللى حصلتلى دى
من صاحبتكم و صاحبة الجروب "انجى"
و عن تجربة شخصية لسة طازة
حصلت امبارح......ههههههههههههههههههههه
